MASANJA AMPONGEZA MATUMAINI KUOKOKA AMTAKA KUFUMUA BREKI ZOTE ILI ASONGE MBELE
Na Apostle Darmacy
 |
| Masanja kushoto akiwa na pacha wake Silas Mbise. |
Wiki moja tangu mchekeshaji maarufu nchini aitwaye Matumaini kutoa wimbo
wake wa kwanza wa injili wa kumshukuru Mungu kwa kumponya na ugonjwa
mbaya ambao ulimpata akiwa nchini Msumbiji, mchekeshaji mwenzake
Emmanuel Mgaya a.k.a Masanja Mkandamizaji amempongeza mwigizaji mwenzake
huyo kusonga mbele na kutokatishwa tamaa na watu wengine juu ya uamuzi
wake wa kumpa Kristo maisha yake.
Masanja amesema anajua Matumaini ametendewa jambo kubwa na Mungu la
uponyaji wa afya yake na kumtaka kuendelea kung'ang'ania wokovu huo
kwakuwa uamuzi wake si kutaka kufurahisha watu bali Mungu na kwamba watu
wengi wataanza kumsema vibaya juu ya uamuzi huo, na kwambia kama
ameamua kuokoka anatakiwa kufumua breki zote ambazo zitamzuia katika
maisha yake ya wokovu. Masanja ameendelea kusema kwamba kumekuwa na
wasanii wengi waliotangaza kuokoka lakini wakarudi nyuma, lakini ni
maombi yake kuona Matumaini anasonga mbele na asubiri kuona baraka za
Mungu juu ya maisha yake "jiandae kuolewa hata kama watu watasema hana
umbo namba nane ataolewa tu na hao wenye namba nane watabaki
wakishangaa, watu wakisema hutaolewa kwasababu ni mweusi wala
usiwasikilize kwakuwa utaolewa na watabaki na weupe wao bila kuolewa.
 |
| Matumaini akiwa kazini. Picha kwahisani ya Freebongo.blogspot.com |
Aidha Masanja ambaye alikuwa akiyaongea yote hayo kupitia kipindi cha
Gospel Celebration ndani ya WAPO Radio Fm kama alivyohojiwa na pacha
wake Silas Mbise wakiwa jijini Mbeya kwenye tamasha la muziki wa injili
amewataka vijana, wasanii wengine na watu wote kwa ujumla kufanya uamuzi
wa kumpokea Kristo sasa sio mpaka waugue au wapatwe na shida ndipo
wafanye uamuzi huo kwakuwa ufalme wa Mungu utatekwa na wenye nguvu.
Matumaini ametoa wimbo wake alioupa jina la "Nimepona" aliomshirikisha
mchekeshaji mwenzake aitwaye Kiwewe, Mkono wa mkonole pamoja na
mwanamama Jane Miso aliyeimba vyema kiitikio katika wimbo huo.
Toa Maoni Hapa Chini
